Krónan ekki veikari síðan í byrjun desember í fyrra

Gengi krónunnar hefur veikst um 1,18 prósent það sem af er dags og hefur hún ekki verið veikari síðan í byrjun desember í fyrra, eða um það leyti sem gjaldeyrishöftin voru sett á til að sporna við hruni hennar.

Gengisvísitalan stendur nú í 235 stigum en fór hæst í 236 stigum um ellefuleytið í morgun, samkvæmt upplýsingum frá Kaupþingi.

Líkt og fram kom í Markaðnum í morgun skýrir yfirvofandi vaxtagjalddagi á ríkisbréfum upp á sjötíu milljarða króna að nafnvirði mikla gengislækkun krónunnar upp á síðkastið. Gjalddaginn hljóðar upp á sex milljarða króna, að mestu í eigu erlendra aðila, og má reikna með að um helmingur vaxtagreiðslunnar fari úr landi.

Þá vegur vöruflæði þungt í gengislækkuninni en eftirspurn er meiri nú en áður eftir erlendum gjaldeyri.

Þetta hefur mikil áhrif á gengissveiflur krónunnar en alla jafna þarf lítið að hreyfa við henni þar sem viðskipti með krónur á gjaldeyrismarkaði hafa upp á síðkastið ekki verið mikil.

Viðmælendur Markaðarins sögðu í gær flestir búast við frekari veikingar krónunnar næstu daga eða þar til áhrif vaxtagreiðslunnar fjara út.

Seðlabankinn hefur þó verið að beita sér á gjaldeyrismarkaði í talsvert meiri mæli en áður í því augnamiði að styðja við gengi krónunnar.

Gengi Bandaríkjadals stendur nú í 12,38 krónum, ein evra kostar 181,16 krónur, eitt pund 211,25 krónur og ein dönsk króna 24,3 krónur.