Sala Svöfu eins og blaut tuska í andlit almennings

Eins og blaut tuska framan í andlitið og argasta mismunun að stjórnarmaður í Landsbankanum hafi selt hlut sinn í peningamarkaðssjóðunum á sama tíma og almenningi var ráðlagt að selja ekki, segir einn forsvarsmanna réttlætis.is.

Hörður Hilmarsson er einn af forsvarsmönnum baráttuhópsins réttlæti.is sem hefur barist fyrir því að tapið sem hlaust af uppgjöri peningamarkaðssjóða Landsbankans verði endurheimt. Hann gagnrýnir það harðlega að Svafa Grönfeldt, sem sat í stjórn bankans, hafi tekið út 80 milljónir króna úr peningamarkaðssjóðunum eftir að Glitnir var þjóðnýttur. Hörður segir hópinn alltaf hafa haldið því fram að fólki hafi verið mismunað.

Hörður segir að lögmenn vinni nú að því að ná fram leiðréttingu fyrir þá sem áttu í peningamarkaðssjóðunum en það gangi þó erfiðlega.