Forsetinn fagnar áhuga kínverska auðjöfursins

Ólafur Ragnar Grímsson, forseti Íslands, fagnar áhuga kínverska auðjöfursins Nubos á fjárfestingum á Íslandi. Sem kunnugt er vill Nubo kaupa jörð á Grímsstöðum á Fjöllum og fjárfesta í ferðaþjónustu þar. Forseti Íslands segir þetta til marks um blómstrandi samskipti Íslands við Kína. Evrópa og Bandaríkin hafi hins vegar hundsað Ísland þegar fjármálakreppan skall sem harðast á Íslandi fyrir þremur árum.

Kína og Indland réttu Íslandi hjálparhönd á margvíslegan og uppbyggilegan hátt þegar Evrópuríki voru fjandsamleg og Bandaríkin skiptu sér ekki af," segir Ólafur Ragnar í samtali við Financial Times um málið.

Financial Times vekur máls á því að ákveðnir íslenskir stjórnmálamenn og kaupsýslumenn telji að áhugi Nubos tengist auknum áhuga Kínverja á landinu vegna möguleika á norðursiglingum þegar áhrifa af hlýnun jarðar fer að gæta meira en nú er.

Ólafur Ragnar segir að auðvitað þurfi að skoða hugmyndir Kínverjans gaumgæfilega en engin ástæða sé til þess að hræðast kínverskar fjárfestingar. Hann fagnaði áhuga Kínverja og Indverja á Íslandi á tímum þegar samskiptin við ríki Atlantshafsbandalagsins hefðu versnað.