Úthlutun veiðileyfa í Elliðaánum endurskoðað 2013

Í ár var óvenjumikill fjöldi umsókna um veiðileyfi í Elliðaánum og fengu færri en vildu. Það er því ljóst að breyta þarf um fyrirkomulag úthlutunar leyfa til að gefa sem flestum kost á að veiða í Elliðaánum. Rætt hefur verið að taka frá 2-3 vikur yfir sumartímann og veita ungum félagsmönnum og eldri félögum, ákveðinn forgang á þeim tíma. Öðrum leyfum gæti síðan verið úthlutað á sambærilegan máta og farið er með umsóknir um hreindýraveiði. Stjórn félagsins hefur jafnframt rætt úthlutunarmálin almennt og mun endurskoða úthlutunarreglur í vetur og leggja fram mögulegar breytingar til umsagnar með vorinu.

Rétt er að halda því til haga að ætlunin var að fá félagsmenn að borðinu í fyrravor til að ræða úthlutunarreglurnar á opnum umræðufundi með þjóðfundarsniði. En þar sem áhugi reyndist enginn meðal félagmanna var fundurinn blásinn af. Í nýrri skoðanakönnun SVFR sem gerð var meðal félagsmanna á dögunum er að finna nokkrar áhugaverðar hugmyndir sem vinna þarf úr samhliða endurskoðun á regluverki SVFR. Er það von stjórnar að félagsmenn taki þátt í þeirri umræðu á næstu vikum og mánuðum á vettvangi félagsins. Við veltum því fyrir okkur að boða til opins umræðufundar um efnið fyrir vorið. Félagsmenn sem hafa hugmyndir um hvernig bæta megi úthlutunarkerfið eru hvattir til að senda þær á skrifstofu félagsins á svfr@svfr.is eða beint til stjórnarmanna.

Birt með góðfúslegu leyfi SVFR