SVFR framlengir við Norðurá

Stjórn SVFR og Veiðifélags Norðurár gengu í gærkvöldi frá nýjum samningi um leigu árinnar, en fyrri samningur hefði að óbreyttu runnið út á næsta ári.

Í frétt SVFR er það að sögn Bjarna Júlíussonar, formanns SVFR, mikið ánægjuefni að samningurinn hefur verið endurnýjaður „enda hafa þessir aðilar unnið saman með Norðurá, allar götur síðan 1946".

Norðurá hefur auðvitað um árabil verið ein fengsælasta veiðiá landsins og menn geta verið bjartsýnir í sumar, því þegar hefur sést talsverður lax í ánni. Á Brotinu voru t.d. 12 tifandi sporðar í gær og auk þess sást talsvert af laxi í Berghyl. Norðurá opnar á morgun þegar Bjarni tekur fyrstu köstin upp úr klukkan sjö í fyrramálið á fyrrnefndu Broti.

Bjarni er bjartsýnn, enda hefur hann spáð því að opnun Norðurár verði sú besta á þessari öld. Opnunardaginn í fyrra fengust fimm laxar en það var Ásmundur Helgason sem landaði fyrsta laxinum á Stokkhylsbroti. Það var falleg 84 sentimetra hrygna sem tók Glaða tvíburann. Þá hafði Ragnheiður Thorsteinsson búin að missa fyrsta laxinn sem lét glepjast af agni veiðimanns í fyrrasumar í Norðurá.