Byssubardagi í Breiðholtinu

Þáttaröðin Pressa III kemur út á VOD leigur Vodafone, Skjásins og á filma.is í dag, fimmtudaginn 20. desember. Þáttaröðin var sýnd á Stöð 2 og fór síðasti þátturinn í loftið sunnudagskvöldið 18. nóvember síðastliðinn.

Aðdáendur seríunnar geta því tekið gleði sína um jólin og horft á blaðakonuna Láru klöngrast í gegnum lífið. Serían fékk afskaplega góðar viðtökur á Stöð 2 og greinilegt að Íslendingar hafa smekk fyrir Láru og aðstæðunum sem hún lendir í.

Alls eru sex þættir í seríunni. Nú er Lára flutt heim frá Kanada en faðir hennar þjáist af krabbameini. Alda, dóttir hennar, er orðin fjórtán ára gömul og fer aftur í gamla skólann sinn en Lára byrjar að taka vaktir á Póstinum á meðan ástand föður hennar er enn í óvissu.

Lára er komin með nóg af því að fjalla um harðsvíraða glæpamenn og vill frekar fjalla um efni í léttari kantinum. En fljótlega fara hlutir að gerast. Filipeysk kona brennur inni á veitingastað sem kveikt var í. Böndin berast að samtökum sem lýsa yfir andúð gegn innflytjendum í myndböndum sem er dreift á netinu. En ekki er allt sem sýnist.

Alda er ekki lengur neinn engill. Hún er komin með kærasta sem er heldur betur í vafasömum félagsskap.

Geysimikill hasar er í seríunni og voru nokkrar senur til dæmis teknar upp á húsþaki í Breiðholtinu.

Með aðalhluverk fara Sara Dögg Ásgeirsdóttir, Kjartan Guðjónsson, Þorsteinn Bachmann, Arndís Hrönn Egilsdóttir og Björn Thors en leikstjóri er Óskar Jónasson.

Þess má geta að fyrstu tvær seríurnar af Pressu eru líka fáanlegar á fyrrgreindum VOD leigum.

Þú gætir unnið - vertu með okkur á Facebook.