Seðlabankinn fylgdi ekki verklagsreglum

Verklagsreglum Seðlabanka Íslands var ekki fylgt þegar bankinn lánaði Kaupþingi 500 milljónir evra 6. nóvember 2008. Þá var ekki kannað hver staða Seðlabankans væri varðandi fullnustu á veðinu, en Kaupþing setti fram veð í danska FIH-bankanum. Þetta kemur fram í svari Seðlabankans við fyrirspurn Helga Hjörvar, formanns efnahags- og viðskiptanefndar.

Í svarinu segir að lántöku Kaupþings hafi borið brátt að og því hafi ekki reynst tími til að kanna veðið eða fara eftir verklagsreglum.

„Aðstæður þann 6. október voru með þeim hætti að enginn tími var til að fylgja verklagsreglum formlega eftir. Öll meðferð málsins og ákvarðanataka var hjá æðstu stjórn bankans. Öll áhersla var lögð á að tryggja réttarstöðu Seðlabankans með því að veðsetning tækist."

Lánið var veitt til að vinna bug á lausafjárerfiðleikum Kaupþings, en það átti að greiðast fjórum dögum síðar. Það bar 9,4 prósenta nafnvexti. Ekki var gengið frá skriflegum lánasamningi á þeim degi sem lánið var veitt.

Seðlabankinn telur í svari sínu ólíklegt að FIH-bankinn hefði veitt aðgang að lánasamningum sínum vegna trúnaðar við viðskiptavini.

Danski bankinn var seldur haustið 2010. Hluti kaupverðsins, 1,9 milljarðar danskra króna, var greiddur við söluna en afganginn átti að greiða á fjórum árum. Upphæðin verður þó leiðrétt með tilliti til þess taps sem FIH verður fyrir vegna eigna á efnahagsreikningi bankans á tímabilinu.

Helgi Hjörvar spyr Seðlabankann að því hvort ekki sé óvíst um endurheimtur á helmingi lánsfjárhæðarinnar og fjármagnskostnaðar og líkur séu á að umtalsverður hluti þess geti tapast. Í svari Seðlabanka Íslands segir:

„Talsverð óvissa ríkir um endurheimtur á seljandaláni („Earn-out-agreement") sem veitt var við sölu á hlutafé FIH-bankans ekki síst í ljósi ástands á alþjóðlegum fjármálamörkuðum og efnahagslífi Danmerkur. Það verður ekki fyrr en á árinu 2016 sem endanlega getur legið fyrir hvert verðmæti seljendalánsins verður. Miðað við núverandi stöðu eru líkur á að hluti þess muni tapast."

kolbeinn@frettabladid.is