Snæfríður Baldvinsdóttir bráðkvödd

Snæfríður Baldvinsdóttir, fyrrverandi lektor við Háskólann á Bifröst, var bráðkvödd á heimili sínu í gær. Foreldrar hennar eru Bryndís Schram og Jón Baldvin Hannibalsson, fyrrverandi formaður Alþýðuflokksins.

Snæfríður fæddist í Reykjavík 18. maí 1968, en ólst upp á Ísafirði til tólf ára aldurs. Hún stundaði tónlistarnám við Tónlistarskóla Ragnars H. Ragnar á Ísafirði frá barnsaldri, með fiðluleik sem aðalgrein. Snæfríður lauk stúdentsprófi frá M.R. 1988, en las að mestu utanskóla til prófs, þar sem hún stundaði fyrirsætustörf frá sautján ára aldri með aðsetur í París og Róm.

Snæfríður var búsett í Róm í rúman áratug (1990-2000) og í Mexico City (2001-03), þar sem hún var aðstoðarframkvæmdastjóri Ítalska verslunarráðsins. Á Rómarárunum tók hún B.Sc.-próf í hagfræði og alþjóðasamskiptum frá John Cabot University (1995) og MS-próf í fjármálahagfræði og stærðfræði frá St. John's University (2000). Árið 2011 lauk hún meistaraprófi frá Háskóla Íslands í þjóðhagfræði og hagmælingum (ekonometriu).

Heimkomin árið 2003 gerðist Snæfríður aðjúnkt og síðar lektor í hagfræði við Háskólann á Bifröst. Á s.l. hausti var hún ráðin til starfa sem sérfræðingur hjá Fjármálaeftirlitinu. Frá árinu 2010 sat hún í stjórn Neytendasamtakanna og í framkvæmdastjórn frá hausti 2012.

Fyrri sambýlismaður Snæfríðar var Marco Brancaccia. Saman eiga þau dótturina Mörtu Brancaccia Snæfríðardóttur framhaldsskólanema. Seinni sambýlismaður Snæfríðar var Gunnar Gylfason framkvæmdastjóri.