Kom í kjól úr H&M á Óskarinn

Stórleikkonan Helen Hunt kom mörgum á óvart þegar hún mætti í kjól frá verslunarkeðjunni H&M á Óskarsverðlaunin í gærkvöldi. Það er ekki vaninn að stjörnurnar klæðist kjólum sem eru aðgengilegir venjulegum borgurum, en hátískuhúsin hanna oftar en ekki rándýra kjóla sérstaklega á leikkonur fyrir tilefnið. Kjólinn umtalaði var dökkfjólublár úr satínefni og fór leikkonunni vel þrátt fyrir að vera nokkuð krumpaður. Helen var tilnefnd sem besta leikkona í aukahlutverki fyrir leik sinn í The Sessions en laut í lægra haldi fyrir Anne Hathaway.