Benz nær hraðameti rafmagnsbíla á Nürburgring

Þeir streyma út ofurbílarnir sem eingöngu eru rafdrifnir og þar er ekki síður mikil keppni um þann hraðskreiðasta en meðal venjulegra bíla. Mercedes Benz SLS AMG Coupé Electric Drive ók Nürburgring brautina hraðast allra rafdrifinna bíla og komst undir 8 mínúturnar, sem aðeins ofurbílar ná. Timi hans var 7:56,234 og með því sló hann við Audi R8 e-tron rafbílnum sem átti metið fram að því.

Að vísu er einn rafdrifinn bíll sem farið hefur brautina á skemmri tíma, Toyota Motorsport EV P002, en sá bíll er ekki fjöldaframleiddur né boðinn almenningi heldur einungis smíðaður fyrir keppnisbrautaakstur.

Í myndskeiðinu hér að neðan má sjá allan akstur Benz rafmagnsbílsins á brautinni, frá fyrstu sekúndu til þeirrar síðustu og í því sést bæði hraðamælir, mælir sem sýnir rafmagnsnotkunina og staðsetning bílsins í brautinni. Bíllinn nær oftar en einu sinni 250 km hraða og athyglivert er að sjá hann fara sumar beygjurnar á öðru hundraðinu. Mercedes Benz SLS AMG Coupé Electric Drive er ekki ódýr bíll en í hann má krækja fyrir um 70 milljónir króna.