400 hestafla Yaris í Frankfurt

Margir athygliverðir og óvanalegir bílar verða til sýnis á bílasýningunni í Frankfürt sem hefst eftir minna en mánuð. Þessi mun örugglega vekja tilhlýðilega athygli, en það er ekki á hverjum degi sem Toyota smíðar 400 hestafla Yaris bíl.

Ekki er vitað hversu stór vélin er í þessum bíl og harla ólíklegt að Toyota hafi troðið 8 strokka vél í húddið á honum svo skila megi öllu þessu afli til hjólanna. Líklegra er að hún sé háþrýst minni vél. Eitt er þó víst, bíllinn notast við hybrid búnað til að auka aflið og fær tvo rafmagnsmótora.

Bíllinn ber nafnið Toyota Hybrid R Concept og er byggður á sömu hugmyndafræði og Toyota TS030 Le Mans hybrid bíllinn sem náði frábærum árangri í Le Mans 24 klukkutíma þolakstrinum og skilaði tveimur slíkum bílum næst á eftir sigurvegurunum frá Audi.