Setti hraðamet og var handtekinn

New York búi sem stærði sig af því á netinu að eiga nýtt hraðametið í akstri kringum Manhattan situr nú bak við lás og slá. Ekki er þó ljóst hvernig lögreglan áttaði sig á því um hvern var að ræða þar sem ekkert í myndskeiðinu sem hann birti sýnir hver í hlut á.

Ökumaðurinn, Christopher Adam Tang notaði til hraðakstursins BMW Z4 bíl sinn og náði að komast hringinn á innan við 24 mínútum að nóttu til og myndaði hringinn hraða á leiðinni. Lögreglan náði í hann á heimili hans og setti beint inní klefa þar sem hann dúsir nú liklega frekar óánægður með myndbirtinguna.

Þetta ætti að vera öðrum ökumönnum víti til varnaðar þess að birta myndir af lögbrotum sínum. Kannski rak lögreglan augun í bíl hans fyrir tilviljun fyrir utan heimili hans og með hjálp myndavéla sem tóku myndir af ökuferðinni örlagaríku var hægt að sanna að þar var um bíl hans að ræða.

Myndbandið sýnir ferð hans og nýtt hraðamet sem ökumaðurinn sér nú líklega eftir. Langur er armur laganna.