Barði í Bang Gang í hljómsveit með Jean-Benoit úr Air

Barði Jóhannsson, oft kenndur við Bang Gang, er kominn í nýja hljómsveit ásamt Jean – Benoit Dunckel, sem er jafnframt í hinni goðsagnakenndu hljómsveit Air.



Barði segir, í samtali við Miðdegisþáttinn Ómar á X-977 að sameiginleg vinkona hafi kynnt þá félaga og talið að þeir myndu ná vel sem varð svo raunin. Sveitin sem að þeir félagar hafa stofnað heitir Starwalker og gefur út sitt fyrsta lag í dag. Lagið heitir Bad Weather og hægt er að hlusta á það hér fyrir neðan.

Starwalker mun svo gefa út smáskífu í febrúar og Barði útilokar ekki að sveitin muni jafnvel halda tónleika hér heima.



Barði er víðfrægur fyrir mikla fagmennsku þegar kemur að tónlistarsköpun og við tónlistarupptökur. Segir hann að það hafi verið alger unun að starfa með Jean-Benoit í hljóðveri þeirra Air manna. Þar sé allt til alls og öll aðstaða til fyrirmyndar.



Ný Bang Gang plata er sömuleiðis í vinnslu segir Barði og ættu þær fréttir að gleðja hina fjölmörgu aðdáendur sveitarinnar. Viðtalið í heild sinni má heyra hér fyrir ofan.