IKEA bjórinn – fyrir alla sem hafa aldur til

Þegar félagarnir hringja og maður er í miðri kertaferð í  IKEA gerir það stöðuna oft bærilegri að segjast vera á barnum í Garðabæ. Allir vita hvað maður á við, engin lygi, aðeins lítilsháttar viðsnúningur á aðal- og aukaatriðunum. Vissulega má deila um hvort eiginlegur bar finnist í IKEA en það er öruggt að þar fæst bjór. IKEA selur meira að segja sinn eigin húsbjór og það í tveimur litum, bæði ljósan og dökkan en sá síðarnefndi verður til umfjöllunar hér.

Dökkur IKEA lager er milli þess að vera rúbínrauður og ljósbrúnn með ljósa froðu. Ilmurinn ber með sér maltsætu, smá lakkrís og sýru. Bragðið er létt, vottur af sætu og lítil beiskja.

Bjórnum er greinilega ekki ætlað að brjóta sér nýja leiðir um bragðlaukana og á það sameiginlegt með öðrum IKEA vörum að vera ætlaður öllum. Allavegana öllum þeim sem hafa aldur til.  Hinsvegar er ekki sjálfgefið að dökkur bjór fáist yfir höfuð á íslenskum bar og því á barinn í Garðabæ hrós skilið fyrir úrvalið. Heilt yfir var þessi bjór óvæntur fundur sem kom skemmtilega á óvart miðað við stað og stund. Bjór sem gæti á þessum árstíma jafnvel minnt á jólin.

Fyrir hverja: Alla sem hafa aldur til

Ekki fyrir: Þá sem vilja láta ögra sér

Staður og stund: Þegar verslunarferðin er orðin óbærileg

Rangur staður: Á bjórveiðum[1]