Bílar

Stefnir í methagnað Toyota

Finnur Thorlacius skrifar
Samsetningarverksmiðja Toyota.
Samsetningarverksmiðja Toyota.
Toyota hefur hækkað hagnaðarspá sína fyrir uppgjörsárið sem endar í mars næstkomandi. Upphaflegar áætlanir voru um 1.820 milljarða króna hagnað, en nú stefnir í 2.050 milljarða hagnað. Því gæti þetta ár slegið hagnaðarmetið sem er frá árinu 2008.

Það sem helst skýrir ágætan hagnað Toyota er afar gott gengi í Bandaríkjunum, en útlit er fyrir að Toyota selji alls 2,63 milljónir bíla þar í ár. Svo vel gekk Toyota á þriðja ársfjórðungi í Bandaríkjunum að það sló við heimamerkinu Ford í sölu í fyrsta skipti  síðastliðna 15 ársfjórðunga.

Toyota skilaði frábæru uppgjöri á þriðja ársfjórðungi þessa árs og reis hagnaður þess um 70% milli ára. Toyota gekk líka mjög vel í Evrópu á ársfjórðungnum og hagnaður þar tvöfaldaðist milli ára. Septembermánuður þar var sérlega góður og bendir það til þess að niðursveiflan í bílasölu í álfunni sé á enda og fari að vaxa á ný.

Sala Toyota í Kína jókst verulega í ársfjórðungnum og hefur ekki vaxið meira í fimm ársfjórðunga í röð. Svo virðist sem andstaða Kínverja við Toyota vegna milliríkjadeilu Japans og Kína í fyrra sé í rénun en sala Toyota bíla var dræm í Kína í fyrra sökum þess. 

Mest lesið




×

Mest lesið