Amour frumsýnd á Íslandi annað kvöld

Kvikmyndin Amour er fimmta myndin í sögunni sem er bæði tilnefnd sem besta mynd og sem besta erlenda mynd á Óskarsverðlaunahátíðinni. Hún er einnig tilnefnd fyrir leikstjórn, handrit og aðalleikkonu. Myndin segir frá hjónunum Georges og Anne. Þau eru fyrrverandi píanókennarar sem hafa sest í helgan stein. Einn dag veikist Anne og í ljós kemur að hún þarf að gangast undir aðgerð eigi hún að ná bata. Aðgerðin heppnast þó ekki sem skyldi og er Anne bundin við hjólastól eftir hana. Hún fær eiginmann sinn til að lofa sér því að senda hana hvorki á elliheimili né aftur á spítala og verður Georges við bón hennar. Heilsu Anne hrakar þó enn frekar þegar hún fær heilablóðfall og neyðist Georges að takast á við gjörbreyttar aðstæður endurmeta framtíð þeirra beggja. Dóttir þeirra hjóna, Eva, sem búsett er erlendis, kemur heim og reynir að sannfæra föður sinn um að senda Anne á elliheimili þar sem hún fengi þá aðstoð sem hún þarfnast. Georges neitar að verða við þeirri ósk því þá yrði hann svíkja loforðið sem hann hafði gefið eiginkonu sinni.

Amour hlaut Gullpálmann á kvikmyndahátíðinni í Cannes í fyrra auk þess sem hún hlaut Evrópsku kvikmyndaverðlaunin í flokkunum besti leikur í aðalhlutverki karla, besti leikur í aðalhlutverki kvenna, besta leikstjórn og besta mynd ársins. Austurríkismenn fagna einnig góðri uppskeru hennar í tilnefningum til Óskarsverðlauna.

Með aðalhlutverk fara Jean-Louis Trintignant og Emmanuelle Riva og með hlutverk Evu fer Isabelle Huppert. Leikstjóri og handritshöfundur myndarinnar er hinn þýsk-austurríski Michael Haneke og er sagan byggð á atviki sem átti sér stað í fjölskyldu Hanekes.

Myndin hefur fengið frábæra dóma víðast hvar og á vefsíðunni Imdb.com hlýtur hún 8.1 í einkunn. Á kvikmyndavefsíðunni Rottentomatoes.com hlýtur hún 92 prósent frá gagnrýnendum og 87 prósent frá áhorfendum.