Þrír mánuðir til stefnu

Nú þegar jólahátíðin er yfirstaðin er hægt að taka smá tíma til aflögu og fara yfir veiðidótið svona til að stytta stundirnar í skammdeginu því það er ekki langt þangað til stangirnar verða þandar að nýju.

Þrír mánuðir eru fljótir að líða og margir veiðimenn hafa notað vetur og vormánuði til að undirbúa komandi vertíð með því að sitja yfir fluguhnýtingum og velta því fyrir sér hvar á að veiða í vor.  Mörg vatnana og sjóbirtingssvæðin opna samkvæmt venju 1. apríl og ef veður er gott fjölmenna veiðimenn á þau svæði sem verða opnuð.  Mest er kastað fyrir sjóbirting og hefur Tungufljót, Tungulækur, Varmá og fleiri svæði notið vinsælda þessa fyrstu daga þegar fiskurinn tekur nánast hvað sem dettur fyrir hann.  Hrygningarfiskurinn er á þessum tíma horaður eftir veturinn og er á ferð aftur til sjávar og er honum yfirleitt sleppt, og ætti í raun alltaf að vera sleppt því sem matfiskur er hann handónýtur.  Inn á milli er þó pattaralegur geldfiskur sem er fínn á pönnuna.

Þrátt fyrir að aðeins sé 3. janúar í dag er að heyra á mörgum veiðimönnum að það sé mikil spenna fyrir komandi sumri eftir frábæra veiði í fyrra.  Það er þess vegna nokkuð hár væntingarstuðull fyrir sumrinu og það verður að segjast eins og er að miðað við sveiflur í veiðitölum síðustu tveggja áratuga eru litlar líkur á að niðursveifla eins og sást 2012 endurtaki sig á næstunni.  Við skulum alla vega vona það.