Sem flest hestöfl úr minnsta sprengirýminu

Vélar bíla er sífellt að minnka og hreint með ólíkindum hvað bílaframleiðendur geta fengið mikið afl úr litlu sprengirými þeirra. Segja má að nú standi yfir einkonar stríð í þá veruna.

Volkswagen bílafjölskyldan tekur virkan þátt í því og er að hugleiða að setja á markað Audi S3 Plus bíl með 2,0 lítra vél sem orkar heilum 375 hestöflum. Einnig eru hugmyndir uppi um að nota sömu vél í Volkswagen Scirocco og  Golf R Evo, sem er ný útgáfa Golf sem á að frumsýna á bílasýningunni í Peking í apríl.

Alfa Romeo hefur kreist út 240 hestöfl úr 1,7 lítra vél í 4C bílnum og Mercedes Benz 355 hestöflum úr 2,0 lítra vél sem notuð er í A45 AMG, CLA45 AMG og GLA45 AMG bílana. Því má segja að þessi nýja og aflmikla 2,0 lítra vél frá Volkswagen toppi hina tvo framleiðendurna í afli á sprengirými.

Fyrsti bíllinn sem fá mun þessa öflugu vél í Volkswagen fjölskyldunni verður Audi S3 Plus. Af hverju sá bíll ber ekki nafnið Audi RS3, vekur furðu en Audi ætlar víst að koma fram með nýjan RS3 með allt að 460 hestafla vél. Það er ansi mikið fyrir smávaxinn bíl.