Íslensk stelpa á plötuumslagi Pharrells

Indía Salvör Menuez, íslensk stelpa búsett í New York, er mynduð framan á nýjasta plötuumslagi tónlistarmannsins Pharrell.

Indía var sjálf á leið til Los Angeles, en móðir hennar er Jóhanna Methúsalemsdóttir, skartgripahönnuður, sem heldur úti Kría Jewelry vestan hafs.

„Indía er listakona. Hún hefur verið að leika mikið og gera ýmislegt listtengt,en hún hefur einnig verið að vinna við fyrirsætustörf. Fólk virðist bara finna hana og fá hana með sér í allskonar verkefni,“ segir Jóhanna, og hlær.

Indía var stödd á Íslandi við tökur þegar hún fékk símtalið.

„Þetta var vinur hennar eða kunningi sem var að taka myndina fyrir Pharrell. Hann benti honum á Indíu sem fannst hún svo spennandi að hann borgaði undir hana flug til LA og þau tóku þessar myndir. Ég veit að henni fannst þetta ótrúlega gaman,“ bætir Jóhanna við að lokum.