Minnkandi vinsældir Alviðru í Soginu

Sogið hefur lengi átt stórann hóp aðdáenda og margir veiðimenn telja sumrinu ekki rétt varið ef það er ekki tekinn einn túr í Sogið.

Áin er breið, vatnsmikil og er feiknaskemmtileg að veiða.  Í henni er lax og væn bleikja sem oft getur synt í kringum veiðimanninn í tugatali án þess að líta við flugu, en hún getur líka verið í þannig gír að hún er á í hverju kasti.  Bíldsfellið hefur síðustu ár verið gífurlega vinsælt, stundum er svo mikið sótt í það að það þarf að draga úr umsóknum til að fá úr því skorið hver fær leyfi og hver ekki.  Á sama tíma er mikið af lausum dögum á neðsta svæðinu sem kennt er við Alviðru.  Það er eiginlega alveg ótrúlegt hvað vinsældir þessa svæðis hafa dalað því ekki er hægt að kenna fiskleysi þar um.  Allur sá lax sem veiðist á Bíldsfelli, Syðri Brú og Ásgarði þarf að fara þarna í gegn og geta göngurnar oft verið mjög stórar.  Verð veiðileyfa á besta tíma er ekki nema 23.900 og þarna er fínt veiðihús skammt frá bestu stöðunum, en það er aldrei langt að fara á neinn stað þarna.  

Af hverju skildi þetta svæði ekki vera vinsælla?  Eitt árið var veiðin léleg í Soginu og einhverra hluta vegna slökust á Alviðru, árið eftir sóttu færri um daga þarna og síðan hefur þetta undið upp á sig og er svo komið að sumarið er sáralítið bókað.  Núna þegar leyfin eru ódýr má klárlega gera góð kaup í að taka 2-3 daga saman á besta göngutímanum og gefa sér tíma til að læra á staðina.  Sogið er nefnilega þannig að það þarf að gefa því tíma en það verðlaunar líka þolinmæðina afskaplega vel.  Vonandi verður meiri ásókn þarna þegar nær dregur sumri því svæðið nær alveg heljartökum á manni þegar þú kemst í takt við það.