Eminem á Wembley Stadium

Rapparinn Eminem hefur staðfest að hann komi fram á tónleikum á Wembley Stadium í London þann 11. júlí næstkomandi. Þetta er í fyrsta sinn sem hann kemur fram í London síðan árið 2001.

Í samtali við Zane Lowe á BBC Radio 1 sagðist rapparinn ekki stefna á langt tónleikaferðalag í bráð en hann vilji heldur spila á stórum einstaka tónleikum, líkt og á Wembley Stadium.

Eminem kemur fram með lifandi hljómsveit á tónleikunum, líkt og flestir listamenn gera í dag. Hann segir jafnframt að það sé mun skemmtilegra, og að orkan og hávaðinn sé mun meiri þegar að lifandi hljómsveit er á bak við hann.