Mikið af bleikju að sýna sig í Hraunsfirði

Hraunsfjörður hefur verið feykilega vinsælt veiðisvæði enda er aðkoman góð, vatnið gjöfult og fiskurinn sérstaklega skemmtilegur en jafnframt erfiður viðureignar.

Við höfum frétt af mönnum sem hafa á ferðinni við vatnið og séð mikið líf, sérstaklega í hraunjaðrinum en það er jafnframt mjög góður vorveiðistaður.  Það er engin nýlunda að sjá bleikjuna fara þarna um í litlum torfum á þessum árstíma en það getur verið erfitt að fá hana til að taka.  Þeir sem sýna smá þolinmæði og eru duglegir við að prófa ýmsar veiðiaðferðir gera yfirleitt góða veiði en lykilatriði til árangurs á vorin er að veiða frekar djúpt og nota til þess sökkenda eða sökklínu.  Það eru ýmsar flugur sem gefa vel en Alma Rún, Peacock, Krókurinn og sambærilegar litlar flugur hafa yfirleitt gefið vel.  Besti tíminn í vatninu er yfirleitt á vorin og miðsumars en það er samt ekki algilt.  Það er í raun hægt að gera góða veiði allt tímabilið, þarf bara smá þolinmæði, reynslu og það sakar ekki ef smá heppni er með í för.