Ekki henda girnisafgöngum við veiðistaðinn þinn

Því hefur oft verið miðlað til veiðimanna að henda aldrei girni út í náttúruna, ekki er það bara sóðaskapur heldur getur girnið skaðað dýr sem deila svæðinu með veiðimönnum.

Dæmi um þetta sást við Hlíðarvatn í gær þegar veiðimenn sáu kind sem hafði flækt klaufirnar í 0.30-0.40 mm girni og var hún nokkuð illa á sig komin.  Eins og sést á myndinni sker girnið sig í klaufir dýrsins svo úr verður ljótt sár sem getur gróið illa.  Það tók nokkra vaska Hafnfirska veiðimenn smá tíma að ná kindinni og leysa hana úr flækjunni en eflaust hefur kindin verið því fegin að losna við girnið.  Girnisflækjur við ár- og vatnsbakka eru fuglum og öðrum dýrum hættulegar enda geta dýrin flækst illa í smáum girnisspottum.  Ungar and- og vaðfugla finnast því miður of oft í byrjun sumars dauðir eftir að hafa fest sig í smá girnisflækjum sem þeir losna ekki úr.

Þetta er allt of algengt ennþá í dag að sjá girnisflækjur við veiðistaði, hvort heldur er við ár eða vötn, og það er skömm að því hvernig örfáir einstaklingar í sportinu koma óorði á þá veiðimenn sem ganga vel um náttúruna.  Það hefur verið umtalað hvernig umgengnin hefur batnað til mikilla muna við Þingvallavatn en á sama tíma finnst mörgum hún hafa versnað annars staðar.  Hér þarf sameiginlegt átak allra veiðimanna til að bæta úr þessu enda eigum við ekki að skilja neitt annað eftir en sporin okkar þegar við förum af veiðistað.