Bílar

Volkswagen skákar GM í Kína

Finnur Thorlacius skrifar
Volkswagen Bora í Kína.
Volkswagen Bora í Kína.
Stærsti bílamarkaður heims er í Kína og þar keppast allir bílaframleiðendur við að selja sem mest á meðan kaupgleðin er takmarkalaus. Keppnin er hörð milli tveggja stærstu erlendu bílaframleiðendanna þar, General Motors og Volkswagen.

Á fyrri helmingi þessa árs gerðist það fyrsta sinni í 9 ár að Volkswagen sló við sölu General Motors. Volkswagen seldi 1,8 milljón bíla en GM 1,73 milljón bíla. Á sama tíma í fyrra hafði GM selt 1,56 milljón bíla en Volkswagen 1,53. Vöxtur Volkswagen á milli ára er 18% en GM 11%.

Volkswagen býður nú 63 mismunandi gerðir bíla í Kína en hyggur á að fjölga þeim í 100 til ársins 2018. Volkswagen ætlar að bæta við tveimur verksmiðjum í Kína á næstunni til að geta aukið söluna. Volkswagen bílar eru nú seldir á 2.395 stöðum í Kína en Volkswagen ætlar að fjölga þeim í 3.600.

Volkswagen ætlar að selja meira en 3,5 milljónir bíla í Kína í ár og mun líklega ná að selja meira en 10 milljón bíla í heiminum öllum í ár. Kína er mikilvægasti og stærsti markaður Volkswagen og er því spáð að allt að 35 milljónir bíla muni seljast þar á ári við lok þessa áratugar.

GM ætlar ekki að gefast upp í baráttunni við Volkswagen og hyggst auka framleiðslu sína um 65% til ársins 2020. Barátta fyrirtækjanna tveggja mun því halda áfram á þessum risavaxna markaði fyrir bíla. 

Mest lesið




×

Mest lesið