Hjartnæm smáskilaboð bræddu bílþjófinn

Einstæð móðir fimm barna stóð frekar ráðalaus fyrir utan K-Mart verslun í Bandaríkjunum um daginn er hún sá að bílnum hennar hafði verið stolið. Hún taldi að bílinn myndi hún aldrei sjá aftur, en þá datt henni snjallræði í hug.

Hún mundi eftir því að hún hefði gleymt farsíma sínum í bílnum og brá því á það ráð að senda afar hjartnæm smáskilaboð í hann úr öðrum síma í þeirri von að þjófurinn myndi lesa það. Í skeyti hennar til þjófsins sagði hún meðal annars að nú hefði einstæð móðir með fimm börn tapað bíl sínum og hún kæmist ekki einu sinni í vinnu sína.

Skömmu síðar svaraði þjófurinn á þessa leið. „Mér líður afar illa yfir þessu, en börnin mín þurfa einnig að borða. Síðan ég missti vinnu mína hefur verið hart í ári hjá mér“. Einnig fylgdu í skeyti hans leiðbeiningar um hvernig móðirin gæti nálgast bíl sinn. Móðirin endurheimti bílinn og þurfti ekki að blanda lögreglunni í málið. Það sem kom henni þó mest á óvart var tómur sjálfskiptiolíubrúsi í farþegasætinu, en þjófurinn hafði fyllt á olíuna. Ekki eru allir þjófar eins hrifnæmir og þessi og sjá að sér eftir misgjörðir sínar.