Rússar íhuga að banna innflutning bíla

Viðskiptaþvinganir vestrænna þjóða gegn Rússlandi vegna íhlutunar Rússa í Úkraínu gætu haft miklar afleiðingar fyrir bílaframleiðendur, en Rússar íhuga nú að banna innflutning á bílum frá öðrum löndum.

Rússar eru með þessu að vara þær þjóðir við sem hafa beitt þá viðskiptaþvingunum og víst er að mörgum bílaframleiðendum þætti þetta ekki góðar fréttir ef af yrði. Þetta segjast Rússar meðal annars ætla að gera ef enn frekari þvingunum þeim til handa verður beitt.  

Rússland er stór markaður fyrir bíla og í fyrra seldust þar 2,6 milljónir bíla og stór hluti þess var innfluttur. Það stefnir reyndar í talsverðan samdrátt í bílasölu á þessu ári í Rússlandi og spár gera ráð fyrir 12% minnkun. Sú tala verður vafalaust miklu hærri ef þessar hótanir Rússa verða að veruleika. Sala bíla dróst saman um heil 23% í nýliðnum júlí.

Margir erlendir bílaframleiðendur smíða bíla sína í Rússlandi fyrir Rússlandsmarkað og mun þetta bann einnig gilda fyrir þá framleiðslu. Ford, Volkswagen bílafjölskyldan, Renault, Toyota og Hyundai eru meðal þeirra bílaframleiðenda sem eru með verksmiðjur í Rússlandi og hafa forsvarsmenn þessarra fyrirtækja miklar áhyggjur af þessum hótunum frá Rússlandi.