Ferrari seldist á 4,4 milljarða

Góð fjárfesting virðist vera í gömlum Ferrari bílum, en einn slíkur var sleginn nýjum eigenda á 4.370 milljónir króna á bílauppboði um helgina. Þetta er hæsta upphæð sem greidd hefur verið fyrir bíl á bílauppboði.

Bíllinn er af gerðinni Ferrari 250 GTO og af árgerð 1962 og aðeins voru framleidd 39 eintök af þessari gerð, en þau voru öll ætluð til kappaksturs. Þessi afar verðmæti Ferrari bíll var boðinn upp á bílauppboðinu Bonhams í Bretlandi og var þetta ekki eini Ferrari bílinn sem skipti um eigendur fyrir mikið fé. Ferrari bílar stálu eiginlega sviðinu á uppboðinu en heildarupphæðin sem greidd var þá Ferrari bíla sem seldust í Bonhams nú var 7,6 milljarðar króna.

Þrátt fyrir afar hátt verð þessa bíls er þetta ekki hæsta verð sem greitt hefur verið fyrir bíl, en sá var ekki boðinn upp, heldur skipti um eigendur í einkasölu. Það var bíll sömu gerðar, þ.e. Ferrari 250 GTO af árgerð 1963, en honum hafði verið ekið til sigurs í frægum kappökstrum á fyrri árum.