N-Kórea skuldar Volvo 46 milljarða

Árið 1974 sendi Volvo 1.000 bíla af gerðinni Volvo 144 til Norður Kóreu en hefur aldrei fengið greitt fyrir þá. Þessi skuld hefur safnað drjúgum vöxtum og Volvo reiknast til að N-Kóreska ríkið skuldi fyrirtækinu 46 milljarða króna nú fyrir þessa bíla.

Forsaga málsins er sú að meðlimir stjórnmálaflokka til vinstri í sænskum stjórnmálum börðust fyrir því að Svíar hæfu viðskipti við N-Kóreu enda hafði orðið mikill viðsnúningur í efnahag landsins á sjönda áratugnum og í upphafi þess áttunda. Volvo var eitt fyrsta sænska fyrirtækið til að hoppa á þennan vagn og lánaði N-kóreska ríkinu fyrir öllum þessum bílum, en hefur líklega séð eftir því allar götur síðan.

Mjög stór hluti þessara bíla er enn í notkun í N-Kóreu og vel með þá farið, enda eru þeir einir af fáum bílum sem aka um stræti N-Kóreu. Sjást þeir gjarnan á þeim fáu myndum sem frá landinu lokaða koma. Er það helst til marks um gæði þessara bíla að þeir skuli enn flestir þjóna eigendum sínum 40 seinna. Ef til vill ein besta auglýsing sem Volvo bílar geta fengið. Skuldin stendur þó sem fyrr og verður líklega aldrei greidd.