Honda seinkar kynningu vetnisbíls

Til stóð hjá Honda að kynna nýjan vetnisbíl á bílasýningunni í Los Angeles, sem hefst 21. nóvember. Í stað þess mun Honda kynna bílinn á heimavelli í Japan í dag. Þar fer ekki endanleg útgáfa bílsins, heldur ókláraður tilraunabíll.

Meiningin var að bíllinn færi í sölu á næsta ári, en þau plön hafa breyst og hann verður ekki kynntur til sögunnar fyrr en í mars árið 2016. Honda gefur ekki neinar skýringar á frestuninni.

Honda ætlar að skýra frá innviðum nýja vetnisbílsins á bílasýningunni í LA og meðal annars af hverju afturhjólin eru ekki lengur falin af afturbrettunum, en þannig var hann teiknaður í upphafi.

Talsverðar útlitsbreytingar hafa greinilega orðið á bílnum frá fyrstu myndum af honum og er hann orðinn líkari venjulegum bíl. Bíllinn verður 135 hestöfl og aðeins mun taka 3-5 mínútur að fullhlaða bílinn af vetni.

Svo virðist sem mikil samkeppni ríki á milli Toyota og Honda, en nýr slíkur bíll frá Toyota verður kynntur frá Toyota á næsta ári og því á undan Honda bílnum. Sá bíll kemst tæplega 500 kílómetra á tankfylli. Í leiðinni ætlar Toyota að setja upp hleðslunet fyrir vetnisbíla á New York og Boston svæðinu og markaðssetja bílinn þar í fyrstu, sem og í Japan.