Allra síðasta tækifærið til að sjá Stóru börnin í Tjarnarbíói

Tvær sýningar á Stóru börnunum eftir Lilju Sigurðardóttur í uppsetningu Lab Loka verða í Tjarnarbíói um helgina. Að sögn Birnu Hafstein leikkonu í sýningunni er ástæðan sú að færri komust að en vildu á sýningarnar fyrir jólin. „Áhorfendur voru gífurlega ánægðir og við ákváðum að gefa þeim, sem ekki voru búnir að koma, þetta tækifæri til að bæta úr því,“ segir hún. „En þetta verða allra síðustu sýningarnar svo þeir sem vilja koma verða að drífa sig.“



Birna segir mikla spennu ríkja innan leikhópsins þar sem von sé á aðilum frá Þýskalandi sem komi til landsins gagngert til að sjá sýninguna. „Meira get ég eiginlega ekki sagt strax, en við erum mjög spennt og ánægð með hvað það er mikill áhugi fyrir sýningunni.“



Stóru börnin fékk mikið lof áhorfenda og gagnrýnenda þegar hún var sýnd í nóvember og byrjun desember. Símon Birgisson í Djöflaeyjunni valdi hana sýningu haustsins. Jón Viðar Jónsson, gagnrýnandi Fréttablaðsins, gaf henni fjórar stjörnur í Fréttablaðinu, og að hans mati var Rúnar Guðbrandsson, leikstjóri sýningarinnar, leikstjóri ársins. Þá valdi Sigurður Valgeirsson, gagnrýnandi Morgunblaðsins, hana sem eina af fimm bestu sýningum ársins.