Fagna loksins marg- verðlaunaðri plötu

„Stundum seinkar hlutunum bara svona hjá okkur en okkur langaði að hafa tónleikana í Gamla Bíói og þessi dagsetning hentaði best,“ segir Katrína Mogensen, söngkona hljómsveitarinnar Mammúts. Sveitin fagnar útgáfu nýjustu plötu sinnar, Komdu til mín svarta systir, í Gamla Bíói hinn 30. janúar næstkomandi.

Platan hefur verið áberandi á árslistum og var meðal annars kosin besta plata ársins 2013 að mati Fréttablaðsins, Fréttatímans og Rásar 2 ásamt því að vera valin ein af sjö verðlaunaplötum Kraums tónlistarsjóðs.

„Þetta kom á óvart, við vissum ekki að þetta myndi fara alveg í þessa átt, maður veit aldrei hvað gerist þegar maður gefur út nýja plötu,“ segir Katrína.

Þá hlýtur platan sjö tilnefningar til Íslensku tónlistarverðlaunanna, fyrir lagahöfund ársins, lag ársins, tónlistarflytjanda ársins, textahöfund ársins, söngkonu ársins og hljómplötu ársins.

Platan var tekin upp á Kóngsbakka á Snæfellsnesi og þar sá Axel Flex Árnason um upptökustjórnun. Hún var svo hljóðblönduð og kláruð í Orgelsmiðjunni þar sem Magnús Öder sá um upptökustjórn. Skömmu áður en platan kom út fékk sveitin gullplötu fyrir plötuna Karkari en hún kom út fyrir um fimm árum.

Hljómsveitin Mammút er stofnuð í Þróttheimum árið 2003 og hefur jafnt og þétt stimplað sig inn sem ein af fremstu rokksveitum þjóðarinnar og hefur skapað sér sinn hljóm og stíl.

„Hljómurinn okkar verður einhvern veginn til þegar hljómsveitin er svona mikið saman og spilar mikið saman. Maður heyrir kannski ekki sinn eigin hljóm en við höfum náð að mynda einhvern karakter úr okkar hljómi,“ útskýrir Katrína.

Æfir hljómsveitin mikið að jafnaði? „Við tökum svona æfingatarnir, þar sem við æfum rosalega mikið. Þetta kemur í skömmtum, stundum æfum við mjög stíft eins og þegar við erum að æfa fyrir plötu og eitthvert prógramm en svo koma tímar þar sem við erum bara að spila og einbeita okkur að öðru en að æfa.“

Hljómsveitin semur tónlistina saman og á hver meðlimur alltaf eitthvað í laginu. „Yfirleitt kemur einhver einn með grunn að lagi og við sníðum hann svo til saman.“

Sveitin leggur mikið í útgáfutónleikana. „Við ætlum allavega að hlúa vel að þessum tónleikum,“ segir Katrína og bætir við að sveitin stefni á fleiri tónleika í kjölfarið.

Hljómsveitin æfir nú stíft fyrir tónleikana sem fram fara í Gamla Bíói 30. janúar. Katrína bætir við að sveitin ætli að spila lög af öllum plötunum en jafnframt að taka alla nýjustu plötuna í heild sinni. Miðasala er hafin á midi.is og kostar 2.900 krónur inn.