Viðbragð við því að breytast í konu

Ég vann fyrirlesturinn upp úr MA-ritgerðinni minni þar sem ég fjallaði um þrjár skáldsögur sem eiga átraskanir sameiginlegar, Mávahlátur eftir Kristínu Marju, Skaparann eftir Guðrúnu Evu og Kýr Stalíns eftir Sofi Oksanen,“ segir Elín Björk Jóhannsdóttir, MA í almennri bókmenntafræði. Fyrirlesturinn sem hún vísar til ber heitið „Kona sem átti að vera einsog kókflaska í laginu – Mávahlátur og átraskanir“ og hún mun flytja hann í fyrirlestrasal Þjóðminjasafnsins í hádeginu á morgun.



Spurð um nálgunina á umfjöllunarefnið segist Elín munu byrja á að kynna hina fræðilegu nálgun. „Ég geng svolítið út frá umfjöllun um tvíhyggjuna sem birtist í átröskunarsjúkdómum, sérstaklega anorexíunni, en því hefur verið haldið fram að þeir sem þjást af anorexíu líti á hana sem sigur andans á líkamanum.“



Hvað var það sem olli því að þú valdir þetta viðfangsefni í ritgerðinni? „Ég hef svolítið verið að horfa á líkamann í skáldskap, skrifaði til dæmis BA-ritgerðina mína um mannát í sögu eftir Þórarin Leifsson, þannig að þetta var rökrétt framhald. Þegar ég fór að skoða þessar þrjár skáldsögur komst ég að því að þær áttu ákveðin þemu sameiginleg, svo sem kynþroska og kynverund stúlkna og það er hægt að sjá átraskanir sem viðbragð við því að fara frá því að vera stúlka yfir í að vera kona, með öllum þeim menningarlegu fylgifiskum sem fylgja því ferli.“







Fyrirlesturinn er haldinn af RIKK – Rannsóknastofnun í jafnréttisfræðum við Háskóla Íslands í samstarfi við Þjóðminjasafn Íslands og fer fram í fyrirlestrasal þess frá klukkan 12 til 13 á morgun.