Fengu danskennslu hjá Helga Björns

„Við hlustuðum á lagið og leist ótrúlega vel á það. Það er líka gaman að stíga út fyrir rammann og gera eitthvað nýtt, svo ekki sé minnst á samstarfið með Helga Björns. Það var ekkert nema þrusustuð,“ segir Gígja Skjaldardóttir. Hún, ásamt Bjartey Sveinsdóttur, tók nýverið upp lagið Viltu dansa eftir Magnús Eiríksson með Helga Björnssyni og Reiðmönnum vindanna en þær Bjartey eru þekktastar fyrir að vera í hljómsveitinni Ylju.

Lagið var tekið upp í Stúdíói 313 og segir Gígja að mikið fjör hafi verið í upptökunum.

„Helgi reyndi að kenna okkur sixtísdans sem kallast „shake“. Við vorum ekki alveg með'etta. Ekki eins og hann. Helgi var kominn aðeins lengra í þessu en við. Spurning hvort við æfum okkur aðeins,“ segir Gígja hlæjandi en það var ekki aðeins mannfólkið sem tók sporið í stúdíóinu.

„Hundurinn hans Helga var við hliðina á okkur og söng og dansaði með. Hann heitir Kátur og stendur svo sannarlega undir nafni.“

Þetta er í fyrsta sinn sem stúlkurnar vinna með öðrum tónlistarmönnum án þess að vera undir merkjum hljómsveitarinnar Ylju en lagið Viltu dansa verður frumflutt á útvarpsstöðvum í dag. Bjartey og Gígja láta sér ekki leiðast og næg verkefni eru fram undan hjá Ylju.

„Við erum á fullu að semja nýtt efni og taka upp og við stefnum á að gefa út plötu á þessu ári. Síðan ætlum við að taka Íslandstúr í sumar, fara til Eistlands og spila og hitt og þetta.“