Alltaf að prófa eitthvað nýtt og ferskt

„Mér finnst platan æðisleg og er mjög ánægður með hana. Þarna er að finna allt annan tón en á síðustu plötu,“ segir Högni Egilsson, annar söngvara hljómsveitarinnar GusGus, en sveitin sendi á dögunum frá sér sína níundu hljóðversplötu sem ber titilinn Mexico. Platan er jafnframt sú fyrsta sem Högni tekur þátt í að vinna frá grunni.

„Ég kom inn þegar síðasta plata var langt komin en nú var ég með frá upphafi. Það má eiginlega segja að ég hafi misst meydóminn í trommuforritun við gerð Mexico-plötunnar. Biggi sýndi mér hvernig 808-trommuheilinn virkar og fór svo út og fékk sér kaffi og snúð og á meðan varð til trommutakturinn við lagið God Application. Í kjölfarið var ég farinn að prógrammera takta og svona með Bigga og Stebba,“ útskýrir Högni.

Þessi nýja og ferska plata er ólík síðustu plötu, Arabian Horse, sem kom út árið 2011. „Það má alveg segja að nýja platan sé aðeins bjartari og að taktarnir séu margir hverjir uppstokkaðri.“

Það eru þó ekki eingöngu seiðandi taktar, synthar, grípandi bassalínur og fagur söngur sem fyrirfinnst á plötunni, því fallegar strengjaútsetningar má þar einnig finna, líkt og á Arabian Horse.

„Strengirnir eru útskrifaðir af mér og bróður mínum, Hrafnkeli Orra. Þetta tekur langan tíma en mér finnst frábært að hafa gott vopnabúr og geta smíðað eigin lög með skrifuðum strengjum, það gerir vinnuferlið greiðara,“ segir Högni spurður út í lagasmíðarnar.

Högni fer fögrum orðum um félaga sína í GusGus og nýtur sín greinilega vel í sveitinni. „Stebbi og Biggi eru í raun tvö mismunandi framleiðsluhús ef svo mætti að orði komast. Þeir eru ólíkir og með ólíkan stíl, þeir rífast eitthvað og elskast eitthvað. Þeir eru báðir algjörir jötnar á sinn hátt,“ segir Högni spurður út í félaga sína.

Ásamt Högna syngur Daníel Ágúst einnig með GusGus en hann hefur verið í GusGus frá árinu 1995. „Daníel er ljóðrænn og snjall, æðislegur textahöfundur og er til dæmis með bráðsnjallar myndlíkingar í textunum sínum. Hann er sterkur söngvari og það er frábært að vinna með honum.“

Högni segir einnig Daníel hafa mesta jafnaðargeð sem hann hafi komist í kynni við. „Einu sinni þegar við áttum að fara í flug og uppgötvuðum að vélin átti að fara í loftið eftir korter, tuttugu mínútur, þá var kallað í Daníel og hann svaraði: „Ekkert mál, ég ætla að skella mér í sturtu.“ Það var skemmtilegt,“ segir Högni og hlær.

GusGus fer í tónleikaferðalag í kjölfar plötuútgáfunnar sem hefst í lok júlí í Kaupmannahöfn í Danmörku. „Við förum mjög víða, meðal annars til Póllands, Þýskalands, Rússlands, Mexíkós, Bandaríkjanna og fleiri staða. Við verðum á fullu fram að jólum,“ bætir Högni við.

Næstu tónleikar GusGus á Íslandi eru þann 24. ágúst, þegar sveitin hitar upp fyrir Justin Timberlake í Kórnum. „Það er spennandi, hann er mikill performer og raunveruleg stjarna.“

Mexico hefur fengið prýðisdóma í erlendum miðlum og fékk til að mynda átta stjörnur af tíu mögulegum hjá tónlistarsíðunni The Line of Best Fit, þrjár stjörnur af fimm mögulegum hjá The Guardian og sjö stjörnur af tíu mögulegum hjá PopMatters.

Plötur GusGus og útgáfuár:

Polydistortion - 1997

This Is Normal - 1999

Gus Gus vs. T-World - 2000

Attention - 2002

Forever - 2007

24/7 - 2009

Arabian Horse - 2011

Mexico - 2014

GusGus er ein af þeim íslensku hljómsveitum sem hafa notið meiri vinsælda á erlendri grundu en hérlendis.

Platan Arabian Horse seldist í rúmlega 6.000 eintökum hér á landi en hún kom út árið 2011. Hún er jafnframt mest selda plata sveitarinnar á Íslandi.

Platan Forever, sem kom út árið 2007, seldist í um 4.000 eintökum hér á landi en í 30.000-50.000 eintökum erlendis.

Platan Polydistortion (1997) seldist í um 2.500 eintökum hér á landi en milli 250.000-300.000 eintökum úti í heimi.