Vísur Svantes í Norræna húsinu

Grátbroslegar vísur Svantes eftir danska skáldið Benny Andersen verða fluttar í Norræna húsinu 14. ágúst klukkan 20.20.

Þær fjalla um örlög Svíans Svantes Svendsen sem bjó í Danmörku frá unga aldri eftir að hann varð viðskila við foreldra sína í ferjunni milli Svíþjóðar og Danmerkur.



Kormákur Bragason túlkar Svante og leikur á gítar.

„Ég kynntist þessu efni fyrst 1976 þegar ég var í lýðháskóla í Kungälv í Svíþjóð. Mér fannst músíkin flott og textarnir frábærir og Svante hefur loðað við mig síðan.

Síðar var ég við kennslu í Kungälv ásamt dönskum götuleikhúsmanni. Við settum Svantesviser á fóninn og þá sagði hann: „Nú veit ég hvar þú hefur lært dönsku Kormákur.“

Þeir sem spila með Kormáki eru Karl Pétur Smith á slagverk, Einar Sigurðsson á kontrabassa, Helgi Þór Ingason á píanó og Eðvarð Lárusson á gítar.

Aðgangseyrir er 1.500 krónur og miðar eru seldir við innganginn.