Wannabe mest grípandi popplagið

Lagið Wannabe með The Spice Girls hefur verið kjörið mest grípandi popplag sem komið hefur út allt frá fimmta áratugnum.

Þetta kemur fram í nýrri könnun sem Háskólinn í Amsterdam gerði í samstarfi við Vísinda- og iðnaðarsafn Manchester.

Könnunin var framkvæmd í gegnum nettölvuleikinn Hooked on Music þar sem tólf þúsund manns voru beðin um að mæla hversu fljót þau væru að þekkja 220 lög.

Að meðaltali tók það 2,3 sekúndur fyrir þátttakendur að þekkja Wannabe, samkvæmt BBC. Í næstu fjórum sætum á eftir voru Mambo No 5 með Lou Bega, Eye of the Tiger með Survivor, Just Dance með Lady Gaga og SOS með ABBA.

Markmið könnunarinnar var að rannsaka hvort eitthvað eitt einkenni grípandi popplög.