Hætti að reykja krakk fyrir fimm árum

Fönkgoðsögnin George Clinton úr hljómsveitunum Parliament og Funkadelic segir í nýlegu viðtali við tímaritið Rolling Stone að hann hafi hætt að reykja krakk fyrir fimm árum en að hann hafi samt verið virkur í tónlistinni á meðan.

„Það er það sem kom mér í vandræði! Ég var svo afkastamikill að mér fannst ekkert að. En það var víðs fjarri sannleikanum, af því að hugmyndin með því að komast í vímu er að komast í annarlegt ástand. Og þegar maður er í annarlegu ástandi gerir maður annarlega hluti!“

Clinton segir jafnframt að LSD hafi hjálpað Funkadelic með tónlistarsköpun á sínum tíma. „Það gerði mig jákvæðari og hjálpaði okkur við að prófa nýja hluti sem við hefðum aldrei prófað annars,“ segir Clinton.