Salka Sól með magnaða Sam Smith ábreiðu

Söngkona Amabadama og Reykjavíkurdóttirin Salka Sól Eyfeld mætti í Morgunþáttinn á FM957 og tók gullfallega útgáfu af laginu Stay With Me, með Sam Smith. Með henni var Ellert Björgvin Schram, hljómborðsleikari Amabadama.

Þau ræddu um sögu Amabadama, sem hefur verið til í nokkur ár. En þau voru sammála um að hlutirnir hefðu breyst þegar Salka Sól kom til liðs við sveitina fyrir einu ári síðan.

Einnig sagði Ósk Gunnarsdóttir, útvarpskona á FM, frá því að Salka Sól hafi eitt sinn unnið 50 þúsund krónur í bingói á Prikinu. Salka tók söguna lengra og rifjaði upp að fyrrum kærasti hennar hafi haldið kvöldið og allir hafi haldið að þau hjúin hafi verið að svindla.

Rætt var um ýmislegt fleira í heimsókn þeirra og svo enduðu þau Ellert og Salka á því að taka lagið. Hér að ofan má hlusta á heimsókn þeirra og byrjar söngurinn eftir fjórar mínútur og 20 sekúndur.