Þekktur bílavefur dáist að Fornbílaklúbbnum

Fjöldi erlendra bílablaðamanna hafa verið á Íslandi að undanförnu við prófanir á Land Rover Discovery Sport. Sumir þeirra hafa einnig nýtt ferðina til landsins og kynnt sér íslenska bílamenningu.

Blaðamenn hins þekkt Jalopnik bílavefjar brugðu sér í heimsókn til Fornbílaklúbbsins og heilluðust svo af starfseminni og bílaflotanum að í fyrirsögn um heimsóknina segja þeir að hugsanlega sé Fornbílaklúbburinn íslenski besti bílaklúbbur heims.

Það sem vekur einna mesta furðu blaðamanna Jalopnik er hversu vel tekist hefur að varðveita gamla bíla á Íslandi þrátt fyrir hve illa íslenskt veður og vegir fari með bíla. Ofan á það bætist sífelldur salt- og sandmokstur á göturnar og nálægð við haf geri heldur engum bílnum greiða.

Því telja þeir hjá Jalopnik að það sé furðulegt að nokkur vel varðveittur eldri bíll sé yfir höfuð til á Íslandi, en staðreyndin sé hinsvegar sú að einir 8-9.000 slíkir bílar séu til í söfnum, skemmum og bílskúrum landsins, annaðhvort fulluppgerðir eða í vinnslu. Sé haft í huga að á landinu búi aðeins 330.000 manns lætur nærri að einn af hverjum 35 íbúum landins eigi fornbíl. Það finnst þeim ótrúlegt.