Fín bílasala í risjóttri tíð

Heildarsala á nýjum fólksbílum, sendibílum og bílaleigubílum í janúar og febrúar var rúmum 27 prósentum meiri en á sama tímabili 2014 og þrátt fyrir risjótta tíð í nýliðnum febrúar hélst bílasala umboðanna í samræmi við væntingar. Sala bílaleigubíla virðist haldast nokkuð vel í hendur við aukningu markaðarinns og má leiða að því líkum að bílaleigurnar njóti mjög vaxandi fjölda ferðamanna yfir vetrarmánuðina.

Einstaklingar og fyrirtæki önnur en bílaleigur keyptu 506 bíla í febrúar, sem er um 28% aukning milli ára. Fólk virðist ekki hafa látið veðrið slá sig út af laginu enda hefur undanfarið verið mikið um frumsýningar á nýjum og spennandi bílum af ýmsum stærðum og gerðum. Sömu sögu er að segja af fyrirtækjum sem leita nú í auknum mæli en áður að upplýsingum um hagkvæma endurnýjun bílaflota sinna, m.a. með kaupum á rafbílum.

Áframhaldandi sterk markaðshlutdeild

Eins og taflan hér að neðan sýnir er BL. ehf. með mesta markaðshlutdeild einstakra bílaumboða á landinu það sem af er ári. Nýhafinn marsmánuður hefur farið vel af stað hjá fyrirtækinu enda talsvert um bílakynningar á liðnum vikum, nú síðast á nýjum og breyttum Subaru Outback og Renault Megane í Limited útgáfu, sem frumsýndir voru sl. laugardag, 7. mars. Við sama tækifæri var jafnframt sýndur Subaru Outback sem nú er í fyrsta sinn boðinn með sjálfskiptingu við öfluga dísilvélina.