Jeremy Clarkson kýldi leikstjórann

Eins og hér kom fram í gær var Jeremy Clarkson, einum þáttastjórnenda Top Gear bílaþáttanna, vikið frá störfum í gær, að minnsta kosti tímabundið.

Nýjustu sögur herma að hann hafi ekki aðeins rifist við leikstjóra þáttanna heldur hafi hann einnig slegið til hans. Þá hefur einnig komið í ljós að þetta atvik átti sér stað fyrir um viku síðan, þó svo að fréttir af brottvikningu Jeremy Clarkson hafi ekki borist fjölmiðlum fyrr en í gær.

Stofnuð hefur verið stuðningssíða þar sem 200.000 aðdáendur þáttanna hvetja BBC til að halda Clarkson áfram sem einum þáttastjórnenda. Undanfarið hefur 22. sería af Top Gear þáttunum verið í sýningu og eru þrír þættir eftir.

Til stóð að sýna þann þriðja síðasta næstkomandi sunnudag, en vegna brottvikningar Clarkson verður ekki af sýningu þáttarins þá. Hvenær hann verður sýndur er ekki ljóst enn.