Pallbíll frá Benz

Frá Mercedes Benz barst óvænt tilkynning þess efnis að fyrirtækið ætli að framleiða sinn fyrsta pallbíl við enda þessa áratugar. Þó svo að Bandaríkin sé land pallbílsins verður þessum bíl ekki beint helst að kaupendum þar heldur S-Ameríku, Afríku, Ástralíu og Evrópu. Þó kemur til greina að selja hann í Bandaríkjunum.

Það verður sú deild innan Mercedes Benz sem framleiðir sendibíla sem framleiða mun þennan pallbíl og því má búast við því að hann verði fremur hrár að innan en ekki með íburð eins og í S-Class bílum.

Bíllinn verður hvorki mjög stór né lítill ef marka má þá burðargetu sem Benz stefnir að, eða um 1 tonn. Fyrir nokkrum árum kom upp sú umræða að Mercedes Benz ætlaði að framleiða pallbíl í samstarfi við Nissan, en hætt var við það og þessi pallbíll verður ekki framleiddur í samstarfi við annan bílaframleiðanda.