Prýðileg opnun í Laxá í Dölum

Opnunarhollið í Laxá í Dölum lauk veiðum í gær og náðust fimm laxar á land sem telst prýðilegt í ánni.

Laxá í Dölum er yfirleitt meiri síðsumará og blómstrar yfirleitt þegar halla fer á júlí. Það komu fimm laxar á þessum fyrstu dögum veiðinnar, fjórir stórlaxar og einn smálax. Í ljósi þess að Laxá tels til síðsumarsáa þá eru menn mjög sáttir með þessa byrjun, en veitt er á fjórar stangir út júlímánuð. Laxarnir veiddust í Neðri-Kistu, Lambastaðakvörn og Sólheimafossi, en gaman er að segja frá því að laxinn í fossinum var grálúsugur. Það er því ljóst að lax er genginn fram ána.

"Áin er núna í draumavatni og við erum mjög sáttir við þessa opnun. Það eru erlendir veiðimenn sem eru að veiða ánna núna sem veiða bara á þrjár stangir og það verður gaman að sjá hvernig þeim gengur núna á vaxandi straum" sagði Haraldur Eiríksson hjá Hreggnasa í samtali við Veiðivísi. Laxá er nánast uppseld í sumar fyrir utan eitt laust holl í lok ágúst sem er frábær tími.