Jeremy Scott kærður aftur fyrir hugmyndastuld

Ritstjórn skrifar 6. ágúst 2015 12:00

Graffítílistamaðurinn Joseph Tierney, sem gengur undir listamannsnafninu Rime, ætlar að höfða mál gegn tískurisanum Moschino og yfirhönnuði merkisins Jeremy Scott.

Í ákærunni sakar hann Scott um að hafa stolið einu veggverka sinna og meðal annars sett á kjól í haust og vetrarlínu Moschino 2015.

Söngkonan Katy Perry klæddist kjólnum umrædda á Met Gala hátíðinni í New York fyrr á árinu. Með henni var hönnuðurinn Jeremy Scott klæddur í jakkaföt með samskonar prenti, en þau mættu á hátíðina í bíl sem búið var að skreyta með myndinni líka.

Á upprunalegu veggmyndinni er orðið „vandal“ (skemmdarvargur) og stór, ógnvekjandi augu sem Rime segir að sé óeðlilega líkt myndinni sem prentuð er á kjólinn.

Er þetta ekki í fyrsta sinn sem Scott er ákærður fyrir listaverkastuld, en árið 2013 kærði hjólabrettafyrirtækið Santa Cruz Scott fyrir að stela myndum frá þeim sem hann notaði á haust og vetrarlínu sína 2013.

Scott hefur ekki sent frá sér tilkynningu vegna ákærunnar.

Gigi Hadid í kjólnum á sýningunni og upprunalega myndin.

Nýtt Glamour er komið í allar helstu verslanir - ekki gleyma að tryggja þér eintak!

Komdu í hóp frábærra áskrifenda hér.

Fylgstu með Glamour á Instagram og Facebook.