Hvernig var þetta hægt?

Þegar bílar rekast á í aksturskeppnum er niðurstaðan sjaldnast svona snyrtileg. Þessi ótrúlega staða kom nú samt upp í Porsche Carrera Cup í Frakklandi um helgina.

Þá lögðu fjölmargir Porsche 911 Carrera bílar af stað í einu og fullþröngt var í fyrstu beygjunni og endaði einn þeirra svona líka fagmannlega ofan á bíl annars keppanda og vart sást á bílunum eftir atvikið. Þetta má sjá gerast hér í myndskeiðinu að ofan og það er jafn forvitnilegt áhorfs og niðurstaðan og gerist merkilega hægt.

Ekki er hægt að kvarta yfir styrknum í þaki neðri bílsins en búast má við því að það sé styrkt með veltigrind eins og í öðrum keppnisökubílum. Svo tæplega vegur efri bíllinn salt á þeim neðri að ekki var heiglum hent fyrir ökumann þess efri að yfirgefa bíl sinn án þess að bíllinn ylti niður aftur.

Fyrir þá fáu sem eiga fleiri en einn Porsche 911 er núna gott að vita til þess að hægt er að spara sér bílskúrs- eða bílastæðapláss með því að leggja þeim bara hvorum ofan á annan. Þeir þola það greinilega vel.