Sébastian Loeb í París-Dakar með Peugeot

Það mun ekki skorta góða ökumenn né reynslu í liði Peugeot í næsta París-Dakar þolakstursrall á næsta ári. Í gær var greint frá því að nífaldur heimsmeistari í rallakstri, Frakkinn Sébastian Loeb, yrði einn ökumanna Peugeot.

Hann bætist við fríðan hóp reyndustu ökumanna París-Dakar keppninnar, þeirra Carlos Sainz, Stéphane Peterhansel og Cyril Despres, sem allir hafa unnið þessa mögnuðu keppni.

Sébastian Loeb á ótrúlega sögu í rallakstri og er með 46,2% sigurhlutfall í WRC. Það þýðir að í nærri helmingi þeirra keppna sem hann tók þátt í í World Rally Championship stóð hann uppi sem sigurvegari. Því hefur enginn ökumaður í WRC náð fyrr né síðar.

Auk þess á Sébastian Loeb metið í fjallaklifurkeppninni Pikes Peak í Bandaríkjunum og þar bætti hann fyrra met svo rækilega að ekki er búist við því að það verði bætt á næstu árum.

Allir munu þessir ökumenn aka Peugeot 2008 DKR16 bíl sem breyst hefur mikið frá París-Dakar keppninni í fyrra. Það er ljóst að Peugeot ætlar sér stóra hluti í París-Dakar rallinu sem hefst snemma á næsta ári.