Fín veiði í Varmá

Varmá hefur yfirleitt verið betur þekkt sem vorveiðiá heldur en síðsumarsá þrátt fyrir að vera yfirleitt vel setin af sjóbirting á haustin.

Sjóbirtingurinn er yfirleitt mjög tökuglaður á vorin alveg fram að þeim tíma að hann heldur aftur til sjávar eftir vetursetu í ánni en það jafnast samt fátt á við að eiga við nýgenginn sjóbirting að hausti. Varmá er ein af þessum ám sem fáir fara í á haustin þrátt fyrir að það sé besti tíminn í ánni enda er sjóbirtingurinn að koma inn, feitur og pattaralegur eftir sumar í sjó. Þeir sem hafa skroppið dagsferð í ánna hafa yfirleitt veitt vel og algengt er að heyra tölur frá fimm upp í fimmtán fiska yfir daginn.

Það er líka svolítið öðruvísi að veiða Varmá á haustin en fiskurinn veiðist mun víðar í henni en á vorin enda er hann þá að koma sér í hrygningarbúning og verður oft mjög grimmur á aðskotahluti í hylnum, eins og flugur. Takan getur verið sérlega góð þó það þurfi stundum að fara yfir nokkra veiðistaði til að finna fisk í töku. Það er mikið af fiski í sumum hyljunum og þar sem veðurspá næstu daga er sérstaklega hagstæð fyrir haustveiðina má alveg skora á þá sem vilja fá eina eða tvær viðureignir til viðbótar áður en vetur hefst að kíkja á lausar stangir hjá SVFR.