Veiðitímabilinu formlega lokið

Þá hefur síðustu ánum verið lokað og lokatölurnar eftir þetta frábæra sumar liggja fyrir í svo til öllum ánum.

Síðustu árnar til að loka kláruðu tímabilið 20. október og það veiddist ágætlega á síðasta degi, sérstaklega í Eystri Rangá en þar kom feyknagott skot þegar þrjár stangir settu í 17 laxa og lönduðu 9. Mikið af laxi er eftir í Eystri og Ytri Rangá sem hrygnir í vetur og fer vonandi aftur til sjávar til að koma aftur sem stórlax. Þess ber að geta að hrygning misferst að langstærstum hluta í báðum ánum og þess vegna er veiðinni þar haldið uppi með seiðasleppingu.

Heimturnar voru sérstaklega góðar í Ytri Rangá í sumar en hún trónir á toppnum á þessu tímabili með 8.803 laxa. Við spáðum henni í 9.000 laxa strax í byrjun júlí eftir að hafa ráðfært okkur við leiðsögumenn við ánna en þeir voru mjög fljótir að sjá að Ytri Rangá var að fara í sama takt og hún var í sumarið 2009 þegar 10.791 lax veiddist í ánni.

Vel gengur að bóka í ánna á komandi sumri eins og gefur að skilja og er svo komið að bestu tímabilin eru líklega öll að mestu farin. Hljóðið er almennt gott í veiðileyfasölum enda var sumarið eitt það besta og mun auðveldara er að selja leyfi eftir slíkt sumar. Erlenir veiðimenn eru að koma sterkir til baka og þá sérstaklega breskir veiðimenn eftir afleitt sumar í ánum þeirra í sumar.