Fær BMW 7 tvær nýjar V12 vélar?

Heyrst hefur að BMW ætli að bjóða nýju 7-línuna með tveimur gerðum af Rolls Royce V12 vélum sem báðar verða yfir 600 hestöfl. Núverandi nýja kynslóð bílsins er nú í boði með 3,0 lítra vél með tveimur forþjöppum og 326 hestöfl og 4,4 lítra V8 vél, einnig með tveimur forþjöppum, sem skilar 450 hestöflum.

Það finnst BMW mönnum greinilega ekki nóg og vill að 7-línan keppi einnig við aðra ofurbíla með ógnarafli og hugleiðir því að bjóða hann með 6,6 lítra V12 vélum frá dótturfyrirtæki sínu Rolls Royce. Sú aflminni verður að minnsta kosti 600 hestöfl og sú aflmeiri eitthvað meira en það.

Þessir bílar munu fá stafina BMW 760i og M760i og 760iL í lengdri gerð bílsins. Þessar aflmiklu vélar verða tengdar við 8 gíra sjálfskiptingu, en ekki liggur ljóst fyrir hvort þessir bílar verða fjórhjóladrifnir eða afturhjóladrifnir eins og núverandi gerðir. Heyrst hefur að BMW ætli að setja þessar ofurútgáfur á markað strax á næsta ári. Með þeim ætti góð sala á BMW 7 enn að aukast.