Allir fyrir einn og einn fyrir alla

Flóabandalagið stefnir á að leggja fram árdegis í dag bréf um að kjaradeilu félaganna við Samtök atvinnulífsins verði vísað til Ríkissáttasemjara. Til stóð að samþykkja þetta á fundi samninganefndar félaganna sem að bandalaginu standa í gærkvöldi.

Samkvæmt heimildum blaðsins stóð einnig til hjá Samtökum atvinnulífsins (SA) að vísa deilunni til ríkissáttasemjara, en fundur sem haldinn var í deilunni í gærmorgun var árangurslaus.

Félagsmenn stéttarfélagana sem að Flóanum standa; Eflingar stéttarfélags, Verkalýðs- og sjómannafélags Keflavíkur og nágrennis og Verkalýðsfélagsins Hlífar, eru milli 17 og 18 þúsund talsins.

Sigurður Bessason, formaður Eflingar og talsmaður Flóabandalagsins, segir eitt skref tekið í einu og því ekki farið að huga að mögulegum verkfallsaðgerðum.

„En ef ekki kemst fljótlega skriður á mál þá förum við að skoða okkar stöðu. Það er ekki langur tími til stefnu.“

Þá er í tilkynningu sem Efling sendi frá sér í gær ákvörðun stjórnar HB Granda um 33 prósenta hækkun stjórnarlauna og ákvörðun um greiðslu 2,7 milljarða króna arðs úr fyrirtækinu sögð hafa sett alla framvindu kjaraviðræðna í uppnám.

„Þetta er náttúrlega algjörlega siðlaust,“ segir Sigurður, en Efling krefst þess að HB Grandi afturkalli ákvarðanir sínar.

Kristján Guðmundsson, formaður Verkalýðs- og sjómannafélags Keflavíkur og nágrennis, tekur í sama streng.

„Þetta setti allt á hvolf, herðir fólk og þjappar því saman um þær kröfur sem fram hafa verið settar. Þetta var þeirra versta mögulega útspil í stöðunni og tryggir okkur fullkomna samstöðu.“

Varðandi spurninguna um hvort staða sjávarútvegsins gefi tilefni til að sá geiri semji á öðrum nótum en lagt er upp með hjá SA, vísar Kristján til þess að áður fyrr hafi kjarasamningar afmarkast af getu sjávarútvegsins.

„Þegar illa gekk í fiskinum þá hélt hann öðrum greinum niðri. En núna er peningur í hverjum sporði og lítur vel út með næsta ár. Og auðvitað ætlumst við þá til þess að þau í fiskinum stígi fram og geri vel við sitt fólk.“ 

Kristján segir ljóst að ekki verði samið um neina frostpinna. „Við reiknum alveg með því að gengið verði að þeim greinum sem eru aflögufærar, en það þýðir ekki að við ætlum að skilja eftir þá hópa sem hvað lakast standa á vinnumarkaði. Þau verða ekki skilin eftir ofan í skítnum.“

Inntakið í kröfugerð félaganna segir hann hafa verið annað. „Í því eru allir fyrir einn og einn fyrir alla.“

SA semja ekki um stjórnarlaun fyrirtækja

„Við ákveðum hvorki né semjum um stjórnarlaun í einstökum fyrirtækjum,“ segir Þorsteinn Víglundsson, framkvæmdastjóri SA, í samtali við fréttastofu. Ákvörðun HB Granda um hækkun stjórnarlauna og greiðslu arðs hefur hleypt illu blóði í kjaraviðræður og er harðlega gagnrýnd af fulltrúum verkalýðsfélaga. Þorsteinn segist hins vegar ekki þekkja forsendurnar að baki ákvörðunum fyrirtækisins. „Rétt er þó að benda á að stjórnarlaun í HB Granda eru meðal þeirra lægstu sem þekkjast innan Kauphallarinnar,“ segir hann, en bætir um leið við að SA hafi hvatt stjórnendur til þess að ganga á undan með góðu fordæmi til að stuðla að hóflegum launahækkunum.